Fálkaorðuna til Dalvíkur

Mátti til með að birta þetta bréf sem er birt í Velvakanda í Morgunblaðinu í dag - Gaman af þessu.

ÉG GET ekki orða yfir gestrisni Dalvíkinga í kringum Fiskidaginn mikla. Ég var mætt þarna ásamt fjölskyldu minni á miðvikudeginum og þá var orðið ansi margt um manninn. Á öllum stöðum sem maður þurfti að sækja þjónustu voru allir eins og þeir hafi fengið sér meðferð í mannlegum samskiptum, þvílík kurteisi og lipurð. Meira segja fólkið sem þreif klósettin á tjaldstæðum bæjarins var í essinu sínu alla helgina. Alveg fannst okkur frábært að heimsækja bláókunnugt fólk á föstudagskvöldinu og þiggja hjá því fiskisúpur af hinum ýmsu og allt sem þeim fylgdi. Okkur leið eins og við værum komin heim til vina okkar, sennilega hefur þessi frábæra Vináttukeðja sem mynduð var fyrr um kvöldið átt þátt í þeirri líðan. Skreytingarnar við húsin voru rosalega skemmtilegar og allir virtust taka þátt. Á kvöldin gat maður rölt í bæinn og notið stemmningar eins og gerist á góðu kvöldi í útlöndum, tónlist var leikin af fingrum fram hér og þar og úr görðum og ungir sem aldnir undu sér vel. Þetta er aðeins brot af þessari heimsókn okkar sem ég rifja upp og er alveg viss um að fálkaorðan á fullt erindi til ykkar, Dalvíkingar.

Takk fyrir okkur. Elínborg Ben

Athugasemdir

[Hólmgeir Karlsson, 27.8.2007 kl. 23:00]

Þó þær væru tvær fálkaorðurnar Júlli væri það hófleg viðurkenning :)

[Ylfa Mist Helgadóttir, 28.8.2007 kl. 08:46]

Gaman að lesa þetta bréf! Já, og ég tek undir með kvinnunni, þið eigið svo sannarlega skilið að fá fálkaorður og þær allar saman!

[Jónína Dúadóttir, 29.8.2007 kl. 10:51]

Fiskidagurinn mikli á Dalvík er einfaldlega tær snilld !

[Rúna (IP-tala skráð) 29.8.2007 kl. 14:33]

Sammála síðasta ræðumanni, okkar upplifun af skemmtilegasta degi ársins var ólýsanleg. Næsti fiskidagur fer ekki fram hjá okkur.

 Kv. úr kotinu til familíunnar