Harðskafi

Ég er nýlega búin að heyra nokkrar útgáfur af orðinu "Harðskafi"og ég veit ekki hvort að það tengist því nokkuð hvað ég var að hugsa um í morgunsárið, en þegar ég las fyrirsögnina hér á mbl.is  " Harðfiskur og kynlíf "á grein um annars áhugaverða sýningu Jónu Hlífar datt mér í hug harðskafi. Flestir þekkja orðið frá bókinni hans Arnaldar Indriðasonar sem kom út um jólin í fyrra. Á Vísindavefnum kemur eftirfarandi fram: " Örnefnið Harðskafi er að minnsta kosti til á fimm stöðum sem hér skulu nefndir:

• Fjall upp af Eskifirði.
• Bratt og hátt hamrafjall með gróðurlitlum hlíðum fyrir ofan bæinn í Kálfafellskoti í Fljótshverfi í V-Skaftafellssýslu.
• Hæð eða lágur hryggur í Hlíð í Skaftártungu í V-Skaftafellssýslu.
• Þverhnípt, slétt berg, gráleitt á að sjá í Suður-Hvammi í Mýrdal í V-Skaftafellssýslu.
• Í túninu í Holti undir Eyjafjöllum, Rangárvallasýslu.
  
  Samkvæmt nýjustu orðabók merkir orðið harðskafi ‚lélegt fóður eða fæði‘, en harðskafatún ‚tún með hörðum og þurrum jarðvegi‘. Lýsingarorðið harðskafalegur er haft í merkingunni ‚hrjóstrugur‘ eða ‚harðneskjulegur‘ (Íslensk orðabók). Tvö samsettu orðin eru merkt Austfjörðum í Orðabók Sigfúsar Blöndals. Nafnið Harðskafi kemur fyrir í Hálfs sögu og Hálsrekka.
  
  En þar sem að þetta er nú matarblogg þá ætla ég að koma að enn einum harðskafanum og ekki þeim sísta. Harðskafi er harðfiskur og íslenskt smjör blandað saman og t.d smurt á flatbrauð. (Sjá hér um matarferð á Breiðafirðinum) Niðurstaðan er semsagt þessi mér datt harðskafi í hug vegna harðfisksins en ekki vegna kynlífisins. ...og þetta er sko sannarlega ekki lélegt fóður.
  
  Í gærkvöldi borðaði ég á Krua Siam á Akureyri og í dag kemur smá grein, myndir og sleifagjöf.
  

Harðfiskur og kynlíf

Athugasemdir

[Jónína Dúadóttir, 27.9.2008 kl. 11:24]

Hef smakkað harðskafa á rúgbrauði og það er svakalega gott

[Ásdís Sigurðardóttir, 27.9.2008 kl. 15:30]

Harðskafi á rugbrauð er snilld.  Takk fyrir þessa fræðslu og kveðja á Dalvíkina