Betlandi.

Þessi frétt var á visir.is í morgun

Vinstri græn báðu Alcan um peninga

Steingrímur J. Sigfússon, formaður Vinstri grænna, óskaði eftir að Alcan í Straumsvík styrkti flokkinn um þrjú hundruð þúsund krónur fyrir komandi alþingiskosningar.Drífa Snædal, framkvæmdastýra VG, segir ekki óeðlilegt að flokkurinn óski eftir fjárstuðningi frá álfyrirtækinu. „Við sendum bréf á hundrað stærstu fyrirtækin í landinu og báðum um fjárstyrk. Annars er gengið mismunandi hart eftir þessu, við höfum til dæmis ekki ítrekað beiðnina við Alcan."
Fulltrúar VG börðust síðastliðna helgi gegn stækkunaráformum Alcan í Hafnarfirði.Drífa leggur áherslu á að þótt flokkurinn þiggi peninga frá fyrirtækjum hafi það engin áhrif á stefnu hans. „Við erum í þeirri aðstöðu að vera upp á náð og miskunn fyrirtækja komin, og úrtakið okkar var hundrað stærstu fyrirtækin á Íslandi. Alcan er eitt þeirra."
Samkvæmt stefnu Alcan um allan heim styrkir fyrirtækið ekki stjórnmálaflokka. Ætlar fyrirtækið hvorki að verða við beiðni Vinstri grænna né annarra flokka. Auk VG hefur Frjálslyndi flokkurinn sótt um styrk til Alcan.

Mér finnst þetta ekki vera frétt þannig lagað séð, en sennilega hefði verið betra fyrir VG að sleppa Alcan út listanum til þess að forðast svona umfjöllun. En þessi frétt vekur mig til umhugsunar um hversu fáránlegt það er að stjórnmálaflokkar, hvað sem þeir heita þurfi að vera betlandi fé út um koppa og grundir til kosningabaráttunnar. Allir flokkar ættu að fá jafnháa upphæð frá ríkinu og  ekki krónu meir, banna fé frá fyrirtækjum og ríkum einstaklingum. Með jafnri greiðslu frá ríkinu til allra flokka yrði baráttan réttlátari og jafnari og þá kæmu kostir einstaklinganna og flokkanna skýrar í ljós.

Ríkisstjórnin heldur velli í skoðanakönnun Gallups